Растечкото незадоволство поради високите трошоци за живот, несигурните можности за вработување и проблемите во образованието предизвикува протести во повеќе европски земји. Демонстрациите во Франција, Италија и Албанија беа проследени со насилство, палење објекти и ограбување продавници, додека германските медиуми предупредуваат дека гневот на младите може да добие пошироки размери.
Германскиот весник „Ноје пресе“ наведува дека меѓу причините за насилството во Франција се недостигот од перспективи во одредени предградија, стигматизацијата од полицијата и дискриминацијата при вработување. Сепак, весникот нагласува дека овие проблеми не ги оправдуваат уништувањето и ограбувањата, повикувајќи ја владата да ги санкционира сторителите и истовремено да се справи со подлабоките причини за незадоволството.
„Меркише Одерцајтунг“ оценува дека политичките групи го користат незадоволството на граѓаните за свои цели во пресрет на претседателските избори во Франција. Според весникот, немирите дополнително ги продлабочиле поделбите во земјата и го зголемиле ризикот од политичко свртување кон крајните позиции.
Списанието „Цицеро“, пак, предупредува дека насилството може да биде најава за пошироки проблеми во Европа и западните општества, доколку продолжи слабеењето на општествените врски. Во анализата се критикуваат и оние што, според списанието, поттикнуваат агресија и радикални ставови.
Германските медиуми ја разгледуваат и можноста за слични немири во Германија. „Бадише цајтунг“ пишува дека многу млади се незадоволни бидејќи сметаат дека нивните можности за квалитетно образование и добро платена работа се намалуваат, а животниот стандард на нивните родители им изгледа сè потешко достижен. Весникот предупредува и на зголемена привлечност на радикалните идеи меѓу младите.
На сличен проблем укажува и германскиот научник Клаус Хурелман, кој учествувал во истражувањето „Младите во Германија 2026“. Во разговор за „Вестдојче алгемајне цајтунг“, тој вели дека во повеќе земји се забележува длабоко разочарување кај младата генерација поради нејзината општествена положба и неизвесните изгледи за иднината.
Според Хурелман, младите сметаат дека политичарите не ги земаат сериозно нивните интереси, додека трошоците за самостоен живот растат, а образовните и професионалните можности стануваат понесигурни. Во Германија, незадоволството засега повеќе се изразува преку изборите и на дигиталните платформи отколку преку масовни улични протести.
Научникот предупредува дека ситуацијата може брзо да се промени доколку традиционалните политички партии не најдат начин подобро да ги разберат и застапуваат интересите на младите. Според него, одредени политички одлуки би можеле да станат повод за пошироко протестно движење.
© Vecer.mk, правата за текстот се на редакцијата
