ИТЕН ПОВИК ЗА ПОМОШ ВО ЦРНОТО МОРЕ - Танкер активираше S.O.S сигнал

Vecer | 17.11.2026

ИТЕН ПОВИК ЗА ПОМОШ ВО ЦРНОТО МОРЕ - Танкер активираше S.O.S сигнал
Додај го Вечер како твој извор на Google (се отвора во нов таб)

Танкер за превоз на течен нафтен гас испрати денеска повик за помош во близина на бугарскиот брег на Црното Море, на само неколку десетици наутички милји од локацијата каде што вчера беспилотно летало погоди и потопи друг брод, јавува агенцијата „Ројтерс“ повикувајќи се на поморски извори и локални медиуми. Станува збор за пловилото „Гас Хаски“ (Gas Husky), кое плови под либериско знаме, а алармот за тревога бил активиран на околу 60 наутички милји од ’ртот Калиакра, во рамките на бугарската ексклузивна економска зона. Бугарските поморски власти веднаш покренаа истрага за инцидентот, додека грчката компанија што управува со танкерот засега не е достапна за коментар, поради што сè уште не е позната ниту причината за узбуната, ниту состојбата на пловилото и неговиот екипаж.

Најновата тревога доаѓа само еден ден откако на приближно 40 наутички милји од истиот дел на бугарското крајбрежје потона товарен брод што превезувал пченица по удар од дрон. Овој настан е дел од серијата зачестени поморски напади во Црното Море, поради кои повеќе од 20 морнари веќе се водат како исчезнати и се стравува дека ги загубиле животите. Зачестените инциденти во непосредна близина на територијалните води на земјите-членки на НАТО дополнително ги зголемуваат стравувањата од прелевање на воениот судир меѓу Русија и Украина врз комерцијалниот поморски сообраќај во црноморскиот регион.

© Vecer.mk, правата за текстот се на редакцијата

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk