Во Германија се откриени стотици случаи на детски бракови, а новите податоци покажуваат дека девојчиња на возраст од само 11 години стапуваат во брак со возрасни мажи. Според новите бројки, надлежните органи во германската покраина Баден-Виртемберг регистрирале 358 бракови во кои е вклучено малолетно лице, почнувајќи од април 2012 година. Сепак, браковите биле официјално поништени во само осум од овие случаи.
Податоците беа објавени откако локални политичари од екстремно десничарската партија „Алтернатива за Германија“ (AfD) поднесоа пратеничко прашање до покраинската влада.
Меѓу најекстремните случаи е бракот склучен во 2020 година меѓу единаесетгодишно девојче од Ирак и седумнаесетгодишно момче од Ирак. Не е познато кога или зошто овој брак бил поништен.
Четринаесетгодишно девојче од Авганистан стапило во брак со триесетгодишен маж од Авганистан во 2018 година. И во овој случај, останува нејасно кога или зошто бракот бил поништен.
350 детски бракови од 2015 година
Од 2015 година се регистрирани вкупно 350 случаи на детски бракови. Многу од малолетниците кои стапиле во такви заедници потекнуваат од земји како Сирија, Ирак и Пакистан. Николаос Бутакоглу, еден од политичарите од AfD кои ги побараа податоците, напиша на социјалната мрежа X дека „речиси 40 проценти од детските бракови вклучувале сириски државјани, додека браковите меѓу две лица со германско потекло сочинувале само 0,3 проценти“.
Покраинската влада соопшти дека, и покрај стотиците регистрирани случаи на детски бракови, во моментов не се водат правни постапки за поништување на ниту еден од нив.
Емели Кнол, уште една политичарка од AfD која го покрена прашањето за детските бракови во оваа германска покраина, напиша на Фејсбук дека „детските бракови се неспоиви со нашите вредности“.
„Децата имаат право на безбедност, образование и иднина за која самите можат да одлучуваат. Затоа ни се потребни ефективна заштита, навремена реакција и одлучна борба против присилните бракови“, изјави Кнол.
Суштинско кршење на човековите права
Според податоците од Баден-Виртемберг, огромното мнозинство малолетници кои стапуваат во брак се девојчиња. Податоците на Обединетите нации покажуваат дека речиси една од пет жени во светот стапила во брак пред да наполни 18 години.
Ситуацијата е најтешка во Западна и Централна Африка, каде што 32 отсто од жените стапиле во брак пред да наполнат 18 години. Уште позагрижувачки е податокот дека една од 25 жени во светот стапила во брак пред 15-тата година од животот.
УНИЦЕФ го опишува детскиот брак како „суштинско кршење на човековите права“. На својата веб-страница, оваа организација истакнува дека детскиот брак често го загрозува развојот на девојчињата, бидејќи може да доведе до рана бременост и социјална изолација, да го прекине нивното образование, да ги ограничи можностите за кариера и професионален развој и да ги изложи на ризик од семејно насилство.
© Vecer.mk, правата за текстот се на редакцијата
