Додека јавноста сведочи за сè пожестокиот судир меѓу американскиот претседател Доналд Трамп и украинскиот лидер Володимир Зеленски поради договорот за дизел гориво и заканите за кратење на американските разузнавачки информации, зад кулисите се подготвува сценарио за компромисен крај на војната, објавува списанието „Вашингтон пост“.
Според анализата на познатиот колумнист Дејвид Игнатиус, зад бурните испади на Трамп се крие мировен предлог од четири столбови, конструиран од неговите специјални пратеници Џаред Кушнер и Стив Виткоф, кои одржале таен шестчасовен состанок на Флорида со претставници на Украина, Британија, Франција и Германија.
Четирите столбови на контроверзниот план за мир
Американско-европскиот план се заснива на принципот да му се понуди огромен финансиски и безбедносен пакет на регионот, со цел да се олеснат суровите територијални отстапки:
- Обнова на Украина: Масовен финансиски пакет поддржан од Светската банка и „BlackRock“ за обнова на земјата, исплата на семејствата на загинатите и рестарт на украинската економија.
- Безбедносни гаранции според „Член 5“: Вашингтон и Европа да ѝ понудат на Украина директни гаранции за воен одговор доколку Русија повторно изврши агресија, додека со Москва би се преговарало за рамка која ги уважува нејзините безбедносни барања.
- Енергетски пакт и укинување на санкциите: Изградба на нов гасовод за руски гас и нафта кон Европа, од чиј профит дел би одел директно за Украина, а заземениот курс за укинување на санкциите би и овозможил на Русија долгорочен пристап до европскиот пазар.
- Замрзнување на фронтот и губење територии: Прекин на огнот на постојната линија на боиштето. Ова практично значи дека Киев ќе мора да се откаже од окупираните територии во Донбас, додека Русија ќе се откаже од освојување на цела Украина.
Трамп го скрати притисокот врз руските рафинерии
Главниот камен на сопнување во преговорите останува барањето на Белата куќа Украина итно да ги прекине разорните напади врз руските рафинерии – единственото оружје со кое Зеленски врши огромен економски притисок врз Москва. Трамп, кој сака да ги намали цените на горивата пред претстојните меѓуизбори, веќе му се закани на Киев со укинување на критичната разузнавачка поддршка доколку не се покори.
Сепак, европските дипломати предупредуваат дека Трамп сè уште не сфаќа дека Владимир Путин сака тотална победа, а не само примирје, и дека со заобиколувањето на санкциите за дизел, Белата куќа му олеснува на Кремљ да ја продолжи војната на исцрпување во која Русија досега загуби над 1,4 милиони војници.
© Vecer.mk, правата за текстот се на редакцијата
