Најмалку 14 лица загинаа, а 22 се повредени откако Русија во текот на ноќта изврши жесток напад врз Киев со балистички ракети и бесполотни летала. Според „Би-би-си“, станува збор за еден од најсмртоносните напади врз украинстата престолнина оваа година, додека градоначалникот Виталиј Кличко предупреди дека постои стравување оти под урнатитните на погодените објекти во центарот на градот се уште има затрупани луѓе.
За време на нападот, кој почна по полноќ во средата, началникот на Киевската градска воена управа, Тимур Ткаченко, изјави дека „непријателот повторно масовно го напаѓа Киевскиот Регион“.
Тревогата за воздушен напад траеше повеќе од еден час, додека Киев и неговата околина беа погодени од повеќе бранови балистички ракети. Киевската воена управа соопшти дека во нападите биле оштетени станбени згради и магацини.
Ткаченко изјави дека деветмина загинале во Бориспиљскиот Округ, четири во Бучанскиот Округ и едно во Фастивскиот Округ.
Украина ги повика своите сојузници да ѝ испорачаат повеќе американски пресретнувачки ракети за системите „Патриот“, за да може да се брани од руските балистички напади.
Руското Министерство за одбрана соопшти дека погодило логистички центри и центри за снабдување во Киев и во околниот регион.
„Овие центри беа вклучени во складирањето и во испораката на различни видови оружје и воени материјали, како и во производството и дистрибуцијата на беспилотни летала“, соопшти Министерството.
Оттаму тврдат дека во близина на црноморското пристаниште Одеса погодиле и три товарни брода „кои превезувале оружје и воена опрема“.
Градоначалникот на Киев, Виталиј Кличко, изјави дека постојат стравувања оти под урнатините по нападите врз центарот на градот би можело да има затрупани луѓе.
Тој на „Телеграм“ објави дека четворица од повредените се во тешка состојба.
„Непријателот повторно намерно напаѓа цивили и цивилна инфраструктура“, соопшти Киевската воена управа.
Русија во последните недели ги засили нападите врз Киев, додека и Украина ги зголеми нападите врз руската цивилна инфраструктура, вклучувајќи ги и енергетските објекти.
Украина повеќепати напаѓаше и магацини, меѓу кои и објекти на рускиот гигант за електронска трговија „Вајлдберис“. Во најновите напади врз магацини, во Московскиот Регион вчераутро загинаа петмина, а десет луѓе беа повредени.
Еден ден претходно, руските власти соопштија дека седуммина загинале, а 58 биле повредени откако дрон погодил преполна плажа во јужниот Краснодарски Регион.
Украина, во меѓувреме, изрази огорченост поради видеоснимка на која се гледа како дрон брка човек во Херсон, оценувајќи дека станува збор за намерен „лов“ и „сафари“ чија цел се цивилите.
Двете страни негираат дека намерно напаѓаат цивили.
© Vecer.mk, правата за текстот се на редакцијата
