Најмалку 2.000 луѓе починаа меѓу потврдените случаи во епидемијата на ебола во Конго, покажуваат најновите податоци на владата.
Станува збор за најбрзо растечката епидемија на ебола забележана досега.
Податоците објавени во текот на ноќта покажуваат дека во епидемијата досега се потврдени вкупно 4.381 случај, вклучувајќи 2.011 смртни случаи. Вкупно 704 пациенти се наоѓаат на лекување и во изолација. Овој биланс е забележан речиси три месеци откако епидемијата беше прогласена на 15 мај.
За бројот на починати да достигне 1.000 беа потребни девет недели, а за дополнителни 1.000 само три недели. Тоа дополнително ги засилува предупредувањата на здравствените работници и хуманитарните екипи дека помошта не пристигнува доволно брзо до оддалечените подрачја.
Оваа епидемија на ебола се разликува од повеќето претходни бидејќи за реткиот вирус Бундибуџо, кој е одговорен за заразата, нема вакцини ниту терапија. Светската здравствена организација (СЗО) соопшти вчера дека епидемијата започнала уште во февруари, многу пред властите да ја откријат во едно од најоддалечените и најзагрозените подрачја во Конго.
Првиот вирус на ебола беше идентификуван во 1976 година во близина на реката Ебола, на подрачјето на денешно Конго. Ова е 17-та епидемија на ебола со која се соочува оваа централноафриканска држава – и најголема досега.
© Vecer.mk, правата за текстот се на редакцијата
