Додека денес во Абу Даби започнуваат нови преговори меѓу САД, Русија и Украина за завршување на војната, украинскиот претседател Володимир Зеленски објави дел од неодамнешното интервју на социјалната мрежа X во кое откри дека Американците го замолуваат зад затворени врати да го предаде Донбас на Русија во замена за нејасни безбедносни гаранции.
„Предавањето на украинска земја во замена за мир е обична апстракција. Путин зборуваше за Донбас, а потоа отиде во Киев. Тврдеше дека ги брани луѓето што зборуваат руски јазик, а потоа ги мачеше до смрт во Буча и на други места. Затоа, кога Американците ме прашаа: „Можете ли да го замените Донбас за безбедност?“, веднаш одговорив со контрапрашање: „Можете ли да ми кажете што точно значи тоа? Каква безбедност? НАТО?“ напиша Зеленски.
„Тоа е вашата цел, тоа е и целта на Путин денес“
Според украинскиот претседател, одговорот дојде од американска страна дека тоа нема да биде приклучување кон НАТО, туку „нешто слично на НАТО“.
„Слично? Но, вие не барате „сличен“ одговор за Донбас. Вие сакате јасен одговор за Донбас. Тоа е вашата цел, а тоа е и целта на Путин денес. Што ќе правите ако добиеме гаранции, но не и НАТО?“, рече Зеленски, потсетувајќи дека во минатото Украина веќе го предаде нуклеарното оружје и на крајот беше нападната.
„Не сум ниту обожавател на нуклеарното оружје, ниту мислам дека е добро, светот би бил подобар без него. Но, Русите го зедоа нашето нуклеарно оружје, нели? Го зедоа. Потоа нè запреа на патот кон Европа, па нè спречија да влеземе во НАТО и на крајот нè окупираа. Затоа ова е апстрактно прашање. Никој не верува дека Путин ќе застане ако му го оставиме Донбас. Тој само ќе направи пауза и ќе се врати за една, две или пет години. И кој ќе биде виновен?“, заклучи тој. Зелен.
Студен туш пред преговорите во Абу Даби
Оваа порака од украинскиот претседател доаѓа непосредно пред денешниот почеток на новата рунда трилатерални преговори во Абу Даби, прва по повеќе од осум месеци пауза. САД на преговорите ги претставуваат специјалниот претставник Стив Виткоф и зетот на Трамп, Џаред Кушнер, украинската делегација ја предводи шефот на надворешното разузнавање Рустем Умеров, а руската делегација ја предводи помошникот на Путин, Владимир Медински.
Иако неименувани американски претставници пред состанокот тврдеа дека и Москва и Киев покажуваат знаци на отстапки во врска со можната размена на територии, Зеленски со оваа изјава јасно стави до знаење дека Украина не се согласува да тргува со сопствената територија во замена за кревки ветувања што нема да го спречат Путин од нов напад.
© Vecer.mk, правата за текстот се на редакцијата
