Поранешниот израелски премиер Нафтали Бенет тврди дека пред нападот на Хамас на 7 октомври 2023 година, премиерот Бенјамин Нетанјаху бил посебно предупреден од претседателот на Обединетите Арапски Емирати, Мохамед бин Зајед, дека тогашниот лидер на Хамас, Јахја Синвар, подготвува голема операција против Израел.
Бенет реагираше на истрагата на израелскиот весник „Хаарец“, во која се тврди дека бин Зајед лично го предупредил Нетанјаху за плановите на Синвар околу недела и пол пред нападот. Канцеларијата на Нетанјаху категорично ги отфрла обвинувањата.
Бенет рече дека извештајот на „Хаарец“ дека Бенјамин Нетанјаху добил лично предупредување од лидерот на ОАЕ за плановите на Хамас за војна неколку дена пред нападот на 7 октомври е „точен“, но не откри како знаел дека е вистина.
„Извештајот објавен утрово дека Нетанјаху бил предупреден 10 дена пред масакрот на 7 октомври за намерите на Синвар е точен. Нетанјаху сноси лична и директна одговорност за неуспехот што доведе до смртта на илјадници Израелци под негово водство“, напиша тој на X.
- Мохамед бин Зајед од Емиратите го предупреди Нетанјаху дека Синвар планира операција. Абас Камел, шефот на Генералната разузнавачка служба на Египет, исто така го предупреди Нетанјаху неколку дена пред масакрот дека се подготвува голема операција. Не сакам да зборувам за моите односи со никого. „Ви велам дека знам дека тој факт е вистина“, изјави Бенет за 103FM.
„Тој не направи ништо“
Поранешниот премиер потоа директно го обвини Нетанјаху за одговорност за катастрофата од 7 октомври.
- Нетанјаху слепо нè воведе директно во оваа ужасна катастрофа. Тој беше толку длабоко потопен во својата концепција дека Хамас е корисен и, и покрај тоа што доби експлицитни предупредувања, не направи ништо - рече Бенет.
Според истрагата на Хаарец, бин Зајед имал 45-минутен телефонски разговор со Нетанјаху околу една и пол недела пред 7 октомври. Наводно го предупредил дека Синвар подготвува голема операција против Израел и изразил загриженост дека нападот може да предизвика големо крвопролевање, да го дестабилизира регионот и да го загрози договорот од Абрахам.
Тој додаде дека „непочитувањето на предупредувањето од страна на Нетанјаху претставува криминална небрежност, поради што прави сè што може за да спречи формирање државна истражна комисија за откривање на вистината“, рече Бенет.
„Нетанјаху не излезе на терен. Не ги предупреди водачите на безбедносните сили.“ „Тој не го подготви Израел за нападот. И не ја свика владата!“, додаде тој.
Претседателот на ОАЕ наводно го повикал Нетанјаху сериозно да ја сфати заканата. Израелскиот премиер, според истиот извор, му одговорил дека според неговата проценка, Хамас има намера да дејствува на Западниот Брег и го уверил дека Израел е подготвен за какво било сценарио.
© Vecer.mk, правата за текстот се на редакцијата
