Мурињо во свој стил за доаѓањето на големиот талент во Реал: Не го познавам!

Vecer | 21.11.2026

Мурињо во свој стил за доаѓањето на големиот талент во Реал: Не го познавам!
Додај го Вечер како твој извор на Google (се отвора во нов таб)

Фото: Реал Мадрид/Фејсбук

Доаѓањето на еден од најталентираните млади фудбалери во светот во Реал Мадрид привлече големо внимание во јавноста, но Жозе Мурињо не беше особено расположен да зборува за неговиот потенцијален трансфер.

Станува збор за 16-годишниот Џеј Џеј Габриел, голем талент на англискиот фудбал, кој по заминувањето од Манчестер Јунајтед кариерата ќе ја продолжи во редовите на мадридски Реал.

Габриел оваа недела и официјално објави дека се разделува со Манчестер Јунајтед, клубот во кој пристигна уште на десетгодишна возраст. Иако никогаш не дебитираше за првиот тим, со своите настапи во младинските категории го привлече вниманието на голем број европски гиганти.

Според пишувањата на англиските медиуми, Реал Мадрид постигнал договор со Манчестер Јунајтед за неговото доаѓање, а се очекува младиот фудбалер во јануари да стане член на „кралскиот клуб“, по завршувањето на потребните процедури.

Новинарите на прес-конференцијата пред натпреварот против Селта Виго го прашаа Мурињо што мисли за доаѓањето на младиот Англичанец.

Португалецот, сепак, остана доследен на својот препознатлив стил и не сакаше да навлегува во какви било коментари.

„Немам што да кажам. Не го познавам. Немам никакво мислење за тоа. Имам мислење за моите играчи, за оние со кои работам секојдневно и кои ми се на располагање. Немам мислење за играчи кои не работат со мене“, порача Мурињо.

Габриел минатата сезона постигна 20 голови на 21 натпревар во првенството за тимот на Манчестер Јунајтед до 18 години, а беше прогласен и за најдобар млад играч во оваа категорија.

Откако одлучи да го напушти Манчестер Јунајтед, започна трката за потписот на младиот талент, а на крајот, наводно, Реал Мадрид им ја украде битката на ривалите, иако трансферот сè уште не е официјализиран.

Габриел уште на 14-годишна возраст доби можност да настапува за повозрасните категории на Јунајтед, што доволно говори за тоа колку во клубот верувале во неговиот потенцијал.

Иако пред него има уште многу работа и простор за напредок, јасно е дека од Габриел се очекуваат големи работи. Неговото име веќе стана едно од најзвучните меѓу младите фудбалери, а следните години ќе покажат дали ќе успее да ги оправда огромните очекувања.


sportmedia.mk

© Vecer.mk, правата за текстот се на редакцијата

Најчитани во последни 7 дена

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk