Отсуството на Мбапе од тренингот се случува во период кога француските медиуми сè почесто пишуваат за неговиот статус во репрезентацијата. „Л’Екип“ наведува дека односите околу 27-годишниот напаѓач се влошиле и дека тој е прилично изолиран во националниот тим. Несогласувањата со Усман Дембеле и понатаму траат.
Според францускиот весник, Мбапе му испратил порака на својот соиграч преку „Ватсап“, обидувајќи се да ја подобри ситуацијата, но Дембеле не му одговорил. Дел од фудбалерите и членовите на стручниот штаб сметаат дека ненадејниот интерес на Мбапе за соиграчите е мотивиран од чист опортунизам. Чувството на изолираност дополнително го засилува и отсуството на Маркус Турам, кој не се најде на списокот на повикани фудбалери.
Плановите на Зидан и тензиите со селекторот
Селекторот Зидан планирал да го користи Мбапе на позицијата централен напаѓач, наместо на левото крило. Првиот таков обид во септември траеше помалку од еден час, бидејќи капитенот го повреди коленото на натпреварот против Турција и предвреме го напушти репрезентативниот камп.
Тоа воедно беше и првиот собир на Зидан откако ја презеде селекторската функција на Франција. За тензиите во францускиот табор пишува и италијанскиот весник „Газета дело Спорт“. Весникот наведува дека ниту односот меѓу Мбапе и Зидан не е добар.
