Американскиот претседател Доналд Трамп речиси и да не беше присутен во јавноста за време на Светското првенство. Не присуствуваше на отворањето во Мексико, го пропушти дебито на американската репрезентација и не беше виден на ниту еден натпревар.
Сепак, за големото финале меѓу Шпанија и Аргентина во Њу Џерси ситуацијата ќе биде поинаква.
Според американските медиуми, Трамп ќе присуствува на натпреварот и лично ќе го врачи шампионскиот пехар, што автоматски ја претвора финалната пресметка во настан од највисок безбедносен ризик.
„Ефектот на Трамп“ повторно тема во јавноста
Во американската спортска јавност одамна кружи приказната за таканаречениот „Trump Jinx“ – верување дека тимовите или спортистите кои ги поддржува Трамп често завршуваат поразени.
Како примери се наведуваат неговото присуство на Суперболот во 2025 година, кога Канзас Сити Чифс убедливо загубија од Филаделфија Иглс, како и неколку други спортски настани на кои фаворитите што ги поддржал не успеале да победат.
Поради неговите добри односи со аргентинскиот претседател Хавиер Милеи, дел од шпанските медиуми шпекулираат дека симпатиите на Трамп би можеле да бидат на страната на Аргентина.
Во исто време, тие потсетуваат и на неговите чести критики кон шпанската влада, па дополнителна интрига создава можноста токму Трамп да го врачи трофејот доколку Шпанија стане светски шампион.
Илјадници полицајци и рекордни мерки за безбедност
Присуството на американскиот претседател значително ќе го промени безбедносниот протокол околу „МетЛајф стадиум“.
Навивачите ќе мора да пристигнат најмалку четири часа пред почетокот на натпреварот, бидејќи контролите ќе бидат далеку построги од оние на претходните мечеви.
Се очекува затворање на голем број сообраќајници околу стадионот, проширување на безбедносните периметри и дополнителни ограничувања во воздушниот простор.
Американското Министерство за домашна безбедност ќе распореди специјални системи за откривање и неутрализирање беспилотни летала, додека илјадници федерални, државни и локални полицајци ќе работат под координација на Тајната служба.
Причина за ваквите мерки се претходните закани и обиди за напади врз американскиот претседател, како и проценките дека финалето на Светското првенство претставува еден од најризичните јавни настани во годината.
Поради движењето на официјалните колони на репрезентациите, ВИП-гостите и претседателската придружба, се очекуваат значителни застои во сообраќајот пред и по натпреварот.
Финалето меѓу Шпанија и Аргентина, покрај борбата за светската титула, така ќе биде во центарот на вниманието и поради невидените безбедносни мерки и присуството на американскиот претседател.
© Vecer.mk, правата за текстот се на редакцијата
