Најдобрата македонска тенисерка Лина Ѓорческа го дозна противникот за својот историски прв настап во главната фаза на Вимблдон. Македонката ќе се соочи со шестата тенисерка на светот, Аманда Анисимова од САД.
Ѓорческа до местото во главниот турнир стигна преку квалификациите, каде што забележа три победи и за првпат во кариерата обезбеди настап на еден Грен Слем турнир.
Ждрепката не беше наклонета кон македонската тенисерка, бидејќи веднаш на стартот ја очекува една од фаворитките на турнирот. Анисимова има 24 години и веќе се етаблираше во самиот светски врв, моментално заземајќи го шестото место на ВТА листата.
Главната фаза на Вимблдон започнува на 29 јуни, а Ѓорческа ќе има можност да испише уште една значајна страница во историјата на македонскиот тенис со својот прв настап на најпрестижниот турнир на тревна подлога.
© Vecer.mk, правата за текстот се на редакцијата
