Меѓународниот Аеродром Скопје доби ново престижно европско признание за квалитетот на услугите, откако ја освои ASQ наградата за 2025 година во категоријата „Најпријатно аеродромско искуство во Европа“. Признанието од Меѓународниот совет на аеродроми (ACI World) му беше доделено на Глобалниот самит за патничко искуство во Истанбул, а за скопскиот аеродром ова е 11-та ASQ награда досега. Наградата се темели на директните оценки и повратните информации од патниците преку програмата Airport Service Quality, со што повторно се потврдува високото рангирање на аеродромот според квалитетот на услугите и патничкото искуство.
Наградата ASQ (Airport Service Quality) им се доделува на аеродромите што постојано обезбедуваат непречено, ефикасно и беспрекорно патничко искуство. Оценките од патниците ги опфаќаат клучните аспекти на патувањето низ аеродромот, вклучувајќи ја ефикасноста на чекирањето, безбедносните проверки, јасната ориентација и сигнализација, удобноста на терминалот, чистотата и севкупната практичност и удобност за патниците.
– Добивањето на ASQ наградата за Најпријатно аеродромско искуство во Европа по 11-ти пат е исклучително достигнување и огромна гордост за ТАВ Македонија. Ова признание има особена вредност бидејќи доаѓа директно од нашите патници и ја одразува нивната доверба во услугите што ги обезбедуваме. Воедно, тоа е потврда за посветеноста, професионалноста и тимската работа на нашите вработени, кои секојдневно работат за да обезбедат непречено, ефикасно и пријатно патничко аеродромско искуство. Фактот што оваа награда ја добиваме во период кога опслужуваме рекорден број патници дополнително ја истакнува нашата способност да растеме и да се развиваме, притоа одржувајќи врвен квалитет на услугите – изјави Неџат Курт, генерален директор на ТАВ Македонија.
Меѓународниот Аеродром Скопје беше награден заедно со уште три аеродроми управувани од ТАВ Аеродроми, што ја потврдува посветеноста на групацијата кон обезбедување врвен квалитет на услуги низ целата нејзина аеродромска мрежа. Во рамките на ASQ програмата, Аеродромот Анкара Есенбога, Аеродромот Измир Аднан Мендерес и Меѓународниот Аеродром Тбилиси исто така добија повеќе признанија во своите категории според бројот на патници. Дополнително, Аеродромот Анкара Есенбога и Аеродромот Измир Аднан Мендерес беа вклучени во престижната листа ACI World Director General’s Roll of Excellence, едно од највисоките признанија во рамките на ASQ програмата.
ASQ наградите, кои секоја година ги доделува Меѓународниот совет на аеродроми (ACI World), се меѓу најпрестижните признанија во воздухопловната индустрија. Најновото признание дополнително ја потврдува посветеноста на ТАВ Македонија кон обезбедување висококвалитетно патничко искуство за своите патници. За време на Глобалниот самит за патничко искуство на ACI, ТАВ Аеродроми активно придонесе во дискусиите за иднината на патничкото искуство на аеродромите, преку панел-сесија на која учествуваше Од Феран (Aude Ferrand), главен комерцијален директор на ТАВ Аеродроми. Компанијата воедно ги претстави своите иницијативи насочени кон патниците и најдобрите практики во областа на патничкото искуство пред меѓународните чинители од воздухопловната индустрија.
© Vecer.mk, правата за текстот се на редакцијата
