По долгите најави, Скопје влегува во нова фаза од обновувањето на јавниот превоз – потпишан е договорот за набавка на 150 електрични автобуси, а првите возила, според најавата на градоначалникот Орце Ѓорѓиевски, треба да пристигнат до крајот на годинава.
„Сум ги видел автобусите, ултрасовремени. Веќе нашите тимови работат на двете позиции, Автокоманда и Ѓорче Петров, каде ќе се поставуваат полначите за електричните автобуси“, рече Ѓорѓиевски.
Договорот е потпишан со унгарската фирма „Икарус“.
Ѓорѓиевски рече дека во текот на наредната недела ќе биде распишан тендерот за проектирање и изградба на трасата за Брзиот автобуски превоз (БРТ).
Тендерот за нови автобуси го спроведуваше Министерството за транспорт и врски и ова беше трет тендер откако првите два беа поништени. Министерот Александар Николоски пред еден месец кога заврши тендерот рече дека првите 30 автобуси ќе стигнат до крајот на декември. Според условите во тендерската документација, планирано е сите 150 автобуси да бидат испорачани во рок од 18 месеци.
Проценетата вредност на целокупната набавка, според огласот објавен на Бирото за јавни набавки, изнесуваше околу 51 милион евра. Од 150 автобуси, 100 ќе бидат за Град Скопје, а останатите 50 за другите градови.
© Vecer.mk, правата за текстот се на редакцијата
