Граѓаните што скенирале фискални сметки преку апликацијата „МојДДВ“ во периодот од јули до септември 2026 година треба да го добијат повратот на ДДВ најдоцна до крајот на ноември. Максималниот износ за едно лице за тримесечјето е 2.100 денари.
Управата за јавни приходи засега нема објавено точен датум за исплатата, која ќе зависи од обработката на податоците и префрлањето на средствата на сметките на корисниците.
Висината на повратот се пресметува според прифатените фискални сметки и износот на пресметаниот ДДВ. За купени македонски добра и услуги се враќаат 20 проценти од пресметаниот ДДВ, а за останатите добра и услуги – 10 проценти.
Доколку сите четири члена на едно семејство ја користат апликацијата и го остварат максималниот поврат, заедно можат да добијат до 8.400 денари за едно тримесечје.
Пред исплатата, граѓаните треба да проверат дали во апликацијата имаат внесено точни податоци за трансакциската сметка. Неточните или застарените податоци, особено по промена на банка или затворање на сметка, може да ја одложат исплатата.
Мерката продолжува да се спроведува и во 2026 година. Во текот на 2025 година, според претходно објавените податоци, на граѓаните им биле вратени повеќе од 3,47 милијарди денари, односно околу 56,4 милиони евра.
© Vecer.mk, правата за текстот се на редакцијата
