Објавени годишните конкурси за финансирање проекти од јавен интерес во културата за 2027 година што ги финансира ресорното министерство.
Пријавувањето е исклучиво електронски преку платформата е- услуги. Апликативниот рок е до крајот на следниот месец. Се задржува минималниот праг од 40 бода (од вкупно 100) за финансиска поддршка, како и ограничувањата до четири проекти за правни лица и до две за физички лица со цел да се поттикне квалитет, а не квантитет.
Системот за бодување е унифициран – до 70 бода за квалитет на содржината, до 15 бода за човечки ресурси и до 15 бода за финансиска оправданост.
- Овие конкурси ќе ги поддржат проектите што ја збогатуваат културната понуда, создаваат простор за нови креативни изрази и придонесуваат за меѓународната видливост на македонската култура. Изразуваме искрено очекување дека и оваа година уметниците, здруженијата и културните организации ќе покажат висок интерес и професионална подготвеност, потврдувајќи ја динамичноста и зрелоста на нашата културна сцена, изјави министерот Сулејмани.
Политиката на Министерството е инклузивна, но и одговорна и се поддржуваат сите што создаваат вредност, истовремено инсистирајќи на професионалност, одговорност и мерлив придонес, додаде Сулејмани.
© Vecer.mk, правата за текстот се на редакцијата
