Бугарскиот премиер Румен Радев, за време на 9-от Самит на Европската политичка заедница во Даблин, најави дека повторно ќе го актуелизира прашањето за положбата на Бугарите во Македонија, овој пат на средба со генералниот секретар на Советот на Европа, Ален Берсе.
Според изјавите на Радев пренесени од медиумите, тој оценува дека нема подобрување во односот на македонските власти кон бугарската заедница и дека постојните проблеми се продлабочуваат. Тој посочи дека темата пред Берсе ќе ја постави низ призмата на човековите права, демократијата и владеењето на правото. Претходно, и од Советот на Европа потврдија дека на маргините на самитот во Даблин е предвидена средба меѓу генералниот секретар Берсе и бугарскиот премиер.
Иако бугарските власти во изминатиот период повеќепати ја поврзуваа состојбата на бугарската заедница и уставните измени со евроинтегративниот процес на Македонија, важно е да се направи разлика меѓу надлежностите на меѓународните институции.
Советот на Европа не е тело на Европската Унија и нема влијание врз одлуките за отворање или затворање на поглавјата во пристапните преговори. Неговиот мандат е исклучиво фокусиран на заштита на човековите права, демократската безбедност и владеењето на правото.
Од друга страна, во рамките на формалниот процес со ЕУ, уставните измени и понатаму остануваат услов за продолжување на преговорите – факт што е нотиран и во Извештајот на Европската комисија за 2026 година, каде се констатира дека тие сè уште не се усвоени.
Потегот на Радев да ја отвори оваа тема на форум надвор од структурите на ЕУ не создава автоматски нови формални обврски за Скопје во процесот на евроинтеграција. Сепак, ваквите настапи укажуваат на намерата на Софија прашањето за правата на Бугарите во Македонија постојано да го одржува високо на пошироката европска дипломатска агенда, што пред македонската дипломатија ја наметнува потребата јасно да ги разграничува формалните критериуми на Брисел од билатералните политички оценки.
© Vecer.mk, правата за текстот се на редакцијата
