Премиерот Христијан Мицкоски, во рамки на работната посета на Брисел, учествуваше на Форумот за проширување на Европската Унија, посветен на реформите, инвестициите и економскиот раст.
„Денеска во Брисел остварив средба со Герт Јан Копман, генерален директор на Генералниот директорат за проширување и источно соседство при Европската комисија. Во фокусот на разговорите беа европската перспектива на Македонија, напредокот во реформските процеси и следните чекори во пристапувањето кон Европската Унија“ – напиша Мицкоски во објава на Фејсбук.
Тој повторил дека нашата определба за членство во Европската Унија е јасна и недвосмислена.
„Македонија заслужува европска иднина, заснована на принципиелни односи, почитување и заштита на националните интереси, како и доследно спроведување на реформите во интерес на граѓаните. Продолжуваме со посветена работа, исполнување на реформската агенда, одговорна политика и јасна визија за европска, стабилна и просперитетна Македонија“ – напиша Мицкоски.
Тој исто така се осврнува и на разговорите на Форумот и вели дека проширувањето на Европската Унија треба да биде фокусирано на суштински реформи, модернизација на институциите и нивно поголемо отворање кон граѓаните.
Промените што го засегаат националниот идентитет, смета Мицкоски, не смеат да бидат услов за европска интеграција, бидејќи тоа го доведува во прашање кредибилитетот на самиот процес на проширување.
© Vecer.mk, правата за текстот се на редакцијата