Празничното утро во скопската Зоолошка градина годинава осамна со најубавата можна вест – нов живот. Токму на Божик, ЗОО доби нов жител: мало јагне, родено во духот на празничната радост, кое за кусо време стана миленик и на вработените и на посетителите.
Од Зоолошката градина велат дека јагнето е во одлична здравствена состојба, разиграно и љубопитно, а мајката будно и грижливо е покрај него. Овој природен и тивок празничен момент, како што посочуваат од ЗОО, носи посебна симболика – нов почеток, топлина и живот, токму во деновите кога се слават семејството и заедништвото.
Ваквите раѓања, особено за време на празниците, секогаш внесуваат дополнителна магија во Зоолошката градина. Тие се потсетник на убавината на природата и на радоста што ја носи секој нов живот.
© Vecer.mk, правата за текстот се на редакцијата
