Бројот на регистрирани случаи на западнонилска треска во земјава достигна вкупно 55 лица, од кои 53 се лабораториски потврдени. Според најновите податоци од здравствените установи, од вкупниот број заболени, 52 пациенти морале да бидат хоспитализирани поради симптомите на болеста.
Статистиката покажува дека смртноста кај потврдените случаи во моментов изнесува 11,5 проценти, при што сите починати пациенти биле од машки пол. Дополнително, во болниците се лекуваат четирипати повеќе мажи отколку жени. Просечното времетраење на болничкото лекување е 14 дена, додека во потешките случаи тоа траело и до 29 дена.
Новите случаи на болеста главно се фокусирани во северните и северо-источните делови на Скопје. На терен е потврдено присуство на вирусот и кај птиците во општина Карпош, во близина на Драмскиот театар, е пронајдена третата птица позитивна на западнонилска треска.
Иако состојбата бара претпазливост, во последната недела од август се забележува позитивен тренд на смирување: регистрирани се 5 нови хоспитализации, што е забележителен пад во споредба со претходните три недели кога имаше меѓу 9 и 11 приеми неделно. Здравствените стручњаци апелираат до граѓаните за редовна заштита од комарци како главни преносници на овој вирус.
© Vecer.mk, правата за текстот се на редакцијата
