Планината Водно, едно од најпосетуваните места за рекреација во близина на Скопје, во последниот период привлекува внимание поради сè почестите информации за присуство на диви животни во нејзините шумски предели.
Покрај вообичаените видови кои се среќаваат во природата околу градот, на Водно во неколку наврати биле забележани траги, но и директни средби со покрупни диви животни, меѓу кои мечки, волци и лисици.
Експертите објаснуваат дека ваквите појави се поврзани со повеќе фактори – движењето на животните во потрага по храна и вода, но и промените во нивните природни живеалишта во околните планински региони.
Присуството на лисици во близина на пешачките патеки, според познавачите на дивиот свет, не е невообичаено. Овие животни лесно се приспособуваат на близината на луѓето, а често ги привлекуваат и остатоците од храна кои несовесните посетители ги оставаат зад себе.
Поголема внимателност, сепак, се препорачува поради информациите за појава на волци и кафеави мечки. Иако овие животни по природа избегнуваат контакт со луѓето и најчесто се повлекуваат кога ќе почувствуваат присуство или бучава, нивното движење во близина на урбаните средини бара претпазливост, особено во раните утрински и вечерните часови.
Од надлежните служби апелираат граѓаните кои го посетуваат Водно да се движат по обележаните патеки и да избегнуваат навлегување во непознати и тешко достапни делови од планината.
Посетителите се советуваат да не оставаат храна и отпадоци во природата, бидејќи тоа може да ги привлече дивите животни, а доколку дојде до средба со нив, да останат смирени, да не прават нагли движења и да не се обидуваат да им се приближат.
Надлежните продолжуваат со следење на состојбата на терен, со цел да се обезбеди безбедност на рекреативците, но и зачувување на природниот баланс меѓу дивиот свет и луѓето кои го посетуваат Водно.
© Vecer.mk, правата за текстот се на редакцијата
