Центарот за управување со кризи соопшти дека ја координира акцијата за обезбедување и дистрибуција на вода во Гостивар, поради епидемијата што го зафати градот.
Според ЦУК, денес на располагање на граѓаните на Гостивар се ставени вкупно 100 тони вода за пиење и 78 тони техничка вода во цистерни.
Во моментов на терен се распоредени четири цистерни на следните локации:
- Кај Болницата во Гостивар – цистерна од пет и пол тони вода за пиење;
- Кај Здравствениот дом – цистерна од два тони техничка вода;
- Кај Детската градинка – цистерна од осум тони техничка вода;
- Кај ОВР-МВР Гостивар – цистерна од шест тони вода за пиење.
Во текот на денот во Гостивар се очекува да пристигнат уште девет цистерни и еден камион со резервоар за вода.
Покрај водата во цистерни дополнително, дистрибуирани се 60.000 литри флаширана вода, обезбедена од Министерството за локална самоуправа, како и еден шлеп со флаширана вода за пиење, донација од Општина Неготино, додаваат од ЦУК.
Од таму најавуваат дека ќе продолжат со координација на сите активности на терен и континуирано следење на состојбата, во тесна соработка со надлежните институции, сè до нејзино целосно стабилизирање.
© Vecer.mk, правата за текстот се на редакцијата
