Пожар избувнал денеска над Боговинско Езеро, на Шар Планина, при што според информациите од надлежните институции засега нема опасност за шумскиот фонд. Пожарот е регистриран на пасишта во непристапен планински терен, во граничниот појас меѓу Северна Македонија и Косово.
Регионалниот центар за управување со кризи – Тетово соопшти дека во 11:54 часот Територијалната противпожарна единица – Тетово пријавила пожар над Боговинско Езеро. По добиената пријава, РЦУК – Тетово го известил ЈП „Национален парк Шар Планина“, од каде што потврдиле дека се запознаени со состојбата на теренот.
Од Националниот парк информираат дека пожарот зафатил пасишта, но поради непристапноста на теренот во моментов нема услови за директна интервенција. Наместо тоа, пожарот ќе биде следен, а според досегашните информации не претставува опасност за шумскиот фонд.
Надлежните засега ја следат состојбата на теренот и ќе проценуваат дали ќе биде потребна дополнителна реакција. Особено внимание се посветува на ширењето на пожарот, со оглед на тоа што станува збор за планински и тешко пристапен предел во близина на државната граница.
© Vecer.mk, правата за текстот се на редакцијата
