Судот му одреди осумдневен притвор на жител на кумановското село Чекрези, кој на социјалните мрежи му се заканувал на премиерот, соопшти Министерството за внатрешни работи.
Според информациите, Отсекот за компјутерски криминал при СВР Куманово во содејство со Секторот за компјутерски криминал и Одделот за криминалистичка полиција при БЈБ поднесе кривична пријава по брза постапка против заканувачот од кумановско, поради постоење основи на сомнение за сторено кривично дело „загрозување на сигурноста“.
„На 11.09.2026 на објава на профил на социјална мрежа на Претседателот на Владата на РСМ, пријавениот напишал коментар со заканувачка содржина. Од судија на претходна постапка на пријавениот му е определена мерка притвор во траење од осум дена“ соопшти МВР.
Од Обвинителството претходно објавија само кратко дека лицето му се заканувало и го навредувало премиерот на социјалните мрежи и дека бараат притвор поради ризик од бегство и повторување на делото. Што точно му напишал, не објавуваат.
© Vecer.mk, правата за текстот се на редакцијата
