Џил Бајден потврди дека ракот на простатата кај нејзиниот сопруг, поранешниот американски претседател Џозеф Бајден, се проширил на коските, при што отворено призна дека е свесна за исходот од оваа тешка болест.
Во интервју за магазинот „Пипл“ (People), таа изјави дека се соочува со големи стравови бидејќи тој е речиси десет години постар од неа, но дека се труди да не им подлегнува на црните мисли. Според неа, иако е тешко да се замисли животот без саканата личност, свесното прифаќање на реалноста е единствениот начин да се продолжи понатаму.
Поранешната прва дама на САД истакна дека нејзиниот сопруг по добивањето на дијагнозата останал исклучително силен и отпорен. Таа откри дека тој не ги споделувал своите стравови со неа, што било очекувано со оглед на тоа што тој секогаш бил главниот потперник на целото семејство.
Семејството донело одлука да не се фокусира на негативностите и тешкотиите, туку максимално да го искористи времето што им преостанува. Нивниот пристап е да останат заедно, да наоѓаат причини за радост во мали нешта и целото ова патување да го направат што е можно попозитивно, бидејќи секојдневното живеење во негативност би било непремостлив товар.
© Vecer.mk, правата за текстот се на редакцијата
