Класичните разделници и продолжни кабли со години беа најбрзото решение во ситуации кога во становите нема доволно приклучоци или уредите се наоѓаат далеку од ѕидовите. Сепак, современите правила за уредување на ентериерот од корен го менуваат пристапот кон електричните инсталации, ставајќи го фокусот на функционалноста, криењето на приклучоците и нивното поставување токму на местата каде што најмногу се престојува и работи.
Наместо дополнително спроведување кабли до креветот, софата или работната маса, положбата на приклучоците сè почесто се одредува уште во првата фаза од проектирањето. Приклучоците можат да се вградат во ѕидовите, подовите, елементите од мебелот, па дури и внатре во фиоките.
Во дневната соба, на пример, подниот приклучок може да се постави под масата или гарнитурата кога мебелот е оддалечен од ѕидот, со што се избегнува развлекување кабли низ целата просторија.
Архитектите и дизајнерите затоа истакнуваат дека распоредот на приклучоците треба да го следи планираниот распоред на мебелот, наместо електричните инсталации дополнително да се прилагодуваат на веќе уредениот простор.
– Ваквиот пристап не значи дека продолжните кабли целосно ќе исчезнат од домот. Тие и понатаму можат да бидат корисни кога се менува распоредот на просторијата или кога уредот се користи на место кое не било предвидено при проектирањето. Сепак, идејата е јасна: наместо просторот да се прилагодува на приклучоците, приклучоците сè повеќе се прилагодуваат на просторот – објаснуваат стручњаците.
Вградување во мебел и модерни решенија за кујната
Промените се посебно видливи и во спалните соби. Покрај класичните приклучоци, сè почесто се вградуваат USB-A и USB-C приклучоци директно во ноќните орманчиња или во заглавието на креветот, што овозможува полнење на уредите без потреба од класични адаптери. Истата пракса се применува и во домашните канцеларии, каде што приклучоците и USB-C влезовите се вградуваат директно во работната површина или непосредно под неа, за да се обезбеди напојување за компјутерите, мониторите и другата опрема.
Кујните сепак предничат во примената на овие трендови, со решенија вградени во кујнските острови, работните плочи и фиоките. Меѓу најпопуларните се таканаречените „поп-ап“ (pop-up) приклучоци, кои се во рамнина со површината кога не се користат, а со притискање на копче се подигнуваат.
Ваквите системи бараат внимателно планирање, посебно поради близината на водата, како и нешто поголеми инвестиции, но значително придонесуваат за изгледот на просторот.
Поради тоа, во иднина електричните приклучоци би можеле да станат речиси невидлив дел од домот – распоредени на повеќе места, но скриени во подовите, мебелот, фиоките и работните површини.
© Vecer.mk, правата за текстот се на редакцијата
