Адвокатите на Ерин Патерсон, Австралијката осудена за тројно убиство со отровни габи, на жалбеното рочиште тврдат дека поротата за време на судењето не била прописно изолирана. Со овој аргумент нејзиниот правен тим се обидува целосно да ја оспори пресудата.
Патерсон (51) минатата година беше прогласена за виновна откако во 2023 година им сервираше ручек со говедско месо во кое ставила зелена пупавка, една од најсмртоносните габи во светот, на родителите на нејзиниот сопруг, како и на неговата тетка и тетин. Таа беше осудена и за обид за убиство на тетинот, кој за среќа успеа да преживее. Целиот морбиден настан се случи во нејзиниот дом во Леонгата, на југоистокот на Австралија.
Судот првично ѝ изрече доживотен затвор со можност за условен отпуск дури по 33 години. Трочленото судско време сега ја разгледува нејзината жалба, но и жалбата на обвинителството кое бара уште построга казна. Патерсон го следеше рочиштето во Врховниот суд во Мелбурн преку видеоврска од затворот.
Одбраната тврди дека поротата била компромитирана
Нејзиниот адвокат, Ричард Едни, тврди дека праведноста на целото судење била сериозно нарушена бидејќи поротниците престојувале во ист хотел со полицискиот сведок и членовите на обвинителството. Тој го нарече овој пропуст фундаментална грешка во едно од најпознатите судења во историјата на Австралија, иако призна дека нема директни докази за нивна меѓусебна комуникација.
Одбраната исто така тврди дека одредени докази, меѓу кои и фотографии од габите, биле погрешно изоставени од постапката, обвинувајќи го обвинителството за неправедно и агресивно испитување.
Од друга страна, обвинителството поднесе жалба сметајќи дека казната е преблага и дека рокот од 33 години за условен отпуск е недоволен. Според нив, судијата направил грешка кога проценил дека Патерсон ќе помине долг период во самица, што влијаело врз намалувањето на нејзината казна. Пред детално да ги разгледаат сите аргументи, судиите треба да одлучат дали воопшто постојат оправдани основи за формално прифаќање на жалбената постапка.
© Vecer.mk, правата за текстот се на редакцијата
