Пристапот до социјалните мрежи во Обединетото Кралство ќе биде целосно забранет за корисници помлади од 16 години, најави британскиот премиер Кир Стармер, опишувајќи го овој чекор како „вистинска промена за нашите деца и за нашата иднина“, пренесе „Гардијан“.
„Социјалните мрежи ги прават децата несреќни, им го олеснуваат патот на насилниците да ги вознемируваат и да ги злоставуваат, а можат сериозно да наштетат и на нивното ментално здравје“, изјави Стармер, претставувајќи ги плановите кои одат чекор подалеку дури и од пионерската забрана во Австралија.
Новиот владин план вклучува забрана за сите главни социјални платформи, но и посебни ограничувања за онлајн производите како апликациите за игри, каде целосно ќе биде отстранета опцијата за разговор (чат) со непознати лица.
Владеењето подразбира тешки избори
Британскиот премиер призна дека одлуката не е донесена лесно и дека е свесен оти социјалните мрежи носат и одредени придобивки за младите.
„Сепак, владеењето секогаш подразбира избори, а за мене е кристално јасно дека целосната забрана е вистинскиот избор“, додаде тој.
Како што пишува „Гардијан“ (The Guardian), овие промени, детално изнесени во говорот во Даунинг стрит, се сметаат за клучно наследство од мандатот на Стармер. Тој нагласи дека целта на забраната е да им се даде сигурност на родителите дека „Британија ќе биде подобро место за нивните деца“.
Законите не се само правила, туку и одраз на нашите вредности
Одговарајќи на критиките дека тинејџерите лесно ќе ја заобиколат забраната, Стармер направи споредба со продажбата на алкохол:
„Не велиме: ’О, погледнете, некој тинејџер некако успеал да дојде до алкохол, па затоа ајде воопшто да не се трудиме да ја забрануваме продажбата на алкохол на деца‘. Не го правиме тоа, нели? Нашите закони се правила, но тие се и израз на нашите вредности. Тие го обликуваат општествениот договор, па ова со текот на времето ќе ги промени разговорите што ги водат родителите и очекувањата на самите деца.“
Според него, оваа мерка ќе донесе огромна разлика, правејќи ги децата побезбедни, посреќни и давајќи им „полна слобода да пораснат“.
Законот стапува на сила следната пролет
Целта на британската влада е законот да биде усвоен до крајот на оваа година, а забраната официјално да стапи на сила следната пролет.
Стармер ја објави оваа најава пред публика во која имаше бројни поборници за забраната, вклучувајќи и родители кои ги загубиле своите деца поради опасностите на интернет, на кои јавно им се заблагодари за поддршката.
„Не сум подготвен на компромиси кога станува збор за безбедноста и среќата на нашите деца. Свесни сме дека ова е тешко – тешко е законски да се уреди, тешко е да се регулира и тешко е да се спроведе. Затоа анализиравме широк спектар на мислења, ги проучувавме доказите и учевме од земји како Австралија кои веќе преземаат слични чекори“, заклучи премиерот.
© Vecer.mk, правата за текстот се на редакцијата
