Трагедијата која го снајде шпанското семејство на отворено море добива сè потешки, емотивни тонови. Во грчкиот град Пилoс, Кармен Диез (67) со децата со нетрпение очекува какви било вести за својот сопруг.
Таа преживеа тридневна изолација на едрилицата на која остана целосно сама и без комуникација откако нејзиниот сопруг падна во морето, но одбива да се врати во родниот Бургос додека трагачите не го лоцираат исчезнатиот Хуан.
- Додека тато не се пронајде, не сакам да се вратам во Бургос - е реченицата која, според зборовите на нивниот син Серхио, Кармен ја повторила по спасувањето.
„Таа се обвинува себеси“ Според пишувањето на шпанскиот весник El Mundo, Кармен Диез сега е на безбедно, но се наоѓа во посебно тешка психолошка состојба и прима специјализирана поддршка по невидената траума низ која поминала.
Стручњаците кои ја прегледале препорачале таа да продолжи да прима помош, предупредувајќи го нејзиното семејство дека вистинското психолошко влијание од она што се случило може да се манифестира кога ќе се смири напрегнатоста од првите денови.
- Таа и понатаму раскажува сè со чудна леснотија, речиси како да опишува филм, а не нешто што ѝ се случило нејзе. Сè уште го нема целосно обработено тоа - изјави нејзиниот син за El Mundo.
Семејството е известено дека на шеесет и седумгодишната жена можеби ќе ѝ требаат лекови, а постои и можност да страда од посттрауматско стресно растројство и да ѝ биде потребна поддршка подолг период. Но, веќе се појави и првиот загрижувачки знак: Кармен се обвинува себеси што не реагирала како што треба во критичните моменти откако нејзиниот сопруг паднал во морето.
Падот во морето и драматичните моменти
Според она што го сподели семејството, шеесет и шестгодишниот маж штокуку уловило туна и ја чистел на бродот кога се лизнал во крвта од рибата и паднал во морето.
Кармен добила дозвола за управување со рекреативно пловило „пред многу години“, но никогаш не се соочила со ситуација во која би морала сама да преземе контрола врз едрилицата и истовремено да се обиде да го спаси својот сопруг.
- Го видела во водата и мисли дека можеби требало поинаку да реагира... Се обидуваме да ја убедиме дека не може да го носи тој товар, но таа е скршена - опишува нејзиниот син.
Потоа поминала три дена сама и без комуникација на едрилицата, сè додека не била пронајдена и спасена во петокот.
Нема трага од бизнисменот
Истовремено, загриженоста на семејството расте како што минуваат деновите без каква било трага од шеесет и шестгодишникот. Како што известува El Mundo, потрагата сега продолжува под италијанска координација, меѓутоа, роднините на исчезнатото лице се жалат на недостаток на информации за обемот на операцијата. Како што вели Серхио, семејството е принудено самата да бара информации, воспоставувајќи телефонски повици меѓу Шпанија, Грција и Италија.
- Немаме поим што се случува. Разбираме дека деновите поминаа и дека е многу тешко да се пронајде лице под овие услови. Сите потребни средства можеби се мобилизирани, но ние не знаеме, бидејќи никој не нè известува. Ако не се јавиме самите, ништо нема да дознаеме - тврди тој.
Семејството нагласува дека не тврди оти потрагата е прекината. Она што го бараат е да знаат колку луѓе се вклучени во операцијата, кои средства се сè уште мобилизирани и кои морски области се пребаруваат. El Mundo известува дека исто така се обидел да прибере повеќе информации од надлежните органи, но досега не добил никакви нови информации освен оние што се однесуваат на првичната операција за лоцирање на едрилицата и спасувањето на Кармен.
„Сè што бараме е да продолжат да бараат“
Најголема грижа за семејството сега е текот на времето. „Времето е од суштинско значење. Ако, на пример, денеска не се спроведе потрага, тоа е изгубено време. Пронаоѓањето лице е веќе многу тешко, но ако не се искористат сите можни средства, станува уште потешко“, вели синот на исчезнатиот.
Поради таа причина, тој бара и од шпанските власти поактивно да се вклучат, за да бидат информирани за обемот на потрагата и да разгледаат дали таа може да се засили со дополнителни средства. „Сакаме да разговараме со Министерството за внатрешни работи и да видиме дали може да се мобилизираат повеќе средства. Сè што бараме е да не престанат и да продолжат со потрагата“, нагласува тој.
Кој е исчезнатиот бизнисмен?
Хуан Хосе Мутилба Обрегон има 66 години и работел во областа на информатичките технологии. Со години бил на чело на компанијата D'ors Informática, а подоцна преку компанијата Mutobre S.L. се занимавал и со дистрибуција на вода за претпријатија.
По предвременото заминување во пензија, голем дел од времето му го посветил на морето. Со сопругата патувал ширум Медитеранот, вклучувајќи ги Италија, Франција и Грција.
© Vecer.mk, правата за текстот се на редакцијата
