На една од плажите во Неапол со години веќе може да се види 82-годишниот Антонио Вентре, човек кој сосема случајно стана една од најпрепознатливите локални атракции. Неговите фотографии го обиколија светот, му пишуваше дури и холивудскиот актер Бред Пит, а денес бројни туристи доаѓаат во градот надевајќи се дека ќе го сретнат и ќе се фотографираат со него. Антонио признава дека популарноста понекогаш му станува напорна.
‒ Мојата фотографија го обиколи светот. Бред Пит дури ми ја испрати во приватна порака. Лете често морам да облечам маица ако сакам малку мир, бидејќи луѓето постојано ме запираат и ме молат да позирам - рече Антонио.
Една фотографија му го промени животот
Препознатлив е по големата тетоважа преку градите на која пишува „Tutto passa“ („Сè поминува“). Токму таа порака, заедно со неговото избрчкано лице и поглед, го направи симбол на Неапол.
Прв во 2018 година го забележал францускиот фотограф Патрик Закман од агенцијата Магнум додека работел на документарен проект за Неапол.
‒ Видов човек без маица покрај морето. Натписот „Tutto passa“ веднаш ми го привлече вниманието ‒ раскажа фотографот. Подоцна го фотографирале и британскиот фотограф Сем Грег, како и неаполскиот автор Роби Мекинтош. Токму фотографијата на Мекинтош, на која Антонио стои пред Везув, стана вирална.
Фотографијата му ги отвори вратите и на фотографот
Мекинтош вели дека токму тој портрет му ја променил кариерата.
‒ Ја објавив фотографијата и веднаш стана хит. Запознав бројни врвни фотографи, дури го добив и бројот на Стив Мекари. Таа фотографија ми отвори многу врати, а подоцна работев и кампањи за Gucci ‒ рече тој.
Антонио во меѓувреме стана вистинска туристичка атракција.
Три туристки од Шпанија, кои претходно ги виделе неговите фотографии на Инстаграм, останале во шок кога случајно го сретнале на улица и веднаш го препознале по тетоважата. Една Италијанка од Пулија толку била инспирирана од неговата приказна што и самата го тетовирала натписот „Tutto passa“ на зглобот од раката.
‒ Не би верувале колку луѓе ја направија истата тетоважа ‒ вели Антонио.
Снимал со Coldplay и неаполски репер
Неговата популарност го одведе и во светот на музиката.
Се појави во спот на неаполскиот репер Геолиер, а потоа стана еден од главните протагонисти во спотот што групата Coldplay го сними како посвета на Неапол.
Продуцентката Тереза Салватриче Мартели раскажа дека бендот сакал во спотот да вклучи обични луѓе кои го претставуваат вистинскиот дух на градот.
‒ Режисерот го праша зошто ја направил тетоважата. Антонио е многу повлечен човек и не очекував дека ќе се отвори пред камерата. На крајот стана главна ѕвезда на спотот ‒ рече таа.
Во меѓувреме, соработка му нуделе и производител на вотка, како и познатиот бренд за сладолед „Алгида“.
Тешка животна приказна се крие зад пораката „Сè поминува“
Зад едноставната тетоважа се крие многу болна животна приказна.
Антонио и неговата сопруга Ана имале четири деца. Најстариот син Џенаро починал од леукемија на само 21 година. Неколку години подоцна, сопругата Ана ја изгубила битката со ракот.
Токму по тие трагедии Антонио одлучил да ја тетовира пораката „Сè поминува“, која го потсетува дека, колку и да е тежок животот, ниедна болка не трае засекогаш. На подлактиците ги носи тетовирани имињата на сопругата Ана и ќерката Летиција, додека името на покојниот син се наоѓа преку неговите гради.
‒ Кога сум дома, често ми е тешко и ми иде да заплачам. Но кога ќе дојдам на плажа, ги заборавам сите грижи. Овде израснав и овде се чувствувам најдобро - вели Антонио.
Токму затоа многу жители на Неапол сметаат дека тој не стана симбол на градот само поради фотографиите, туку затоа што со своето лице и животна приказна најдобро ја претставува пораката што ја носи на градите – дека сè во животот, добро или лошо, на крајот поминува.
© Vecer.mk, правата за текстот се на редакцијата
