Во многу погледи, не можеме да се споредуваме со Кристијано Роналдо. Зад неговата форма, изглед и неверојатна физичка подготвеност стојат години професионален спорт, врвни системи за поддршка и тим од експерти кои се грижат и за најситните детали. Сепак, постои една област во која можеме – барем до одреден степен – да се угледаме на него.
На 41-годишна возраст, Роналдо е еден од најстарите играчи кои сè уште настапуваат на највисоко ниво, а тешко е да не се забележи огромната дисциплина и мотивација што стојат зад таквата форма. Се разбира, не мора сите да бидеме елитни спортисти или да живееме според режимот на професионален фудбалер. Сепак, кога станува збор за исхраната, неговата филозофија се покажа како изненадувачки едноставна и може да послужи како пример за многумина од нас.
Кристијано Роналдо отсекогаш посветувал посебно внимание на своето тело, но се чини дека не се потпира на „чудотворни“ методи, помодни диети или трендови од социјалните мрежи. Неговото мени е всушност прилично едноставно. Според спортскиот нутриционист Џони Ондина, клучот не лежи во некоја конкретна храна, туку во нешто што е многу потешко да се одржи отколку што звучи.
„Тајната на исхраната на Роналдо е состојка што им недостасува на 90 проценти од луѓето – дури и на елитните спортисти: доследноста“, изјави Ондина во подкастот „Фит џенерејшн нутришн“ (Fit Generation Nutricion).
Исхраната на Роналдо, додаде тој, е всушност прилично здодевна. Овој елитен спортист не посегнува по егзотична храна што тешко се наоѓа, ниту пак ја гради својата исхрана околу најновиот тренд на социјалните мрежи. Неговата кујна, вели Ондина, е снабдена со сосема обична, природна храна.
Од друга страна, денес – кога информациите се достапни со еден клик – склони сме да веруваме дека хималајската сол ќе направи разлика, дека повеќедневното постење ќе даде спектакуларни резултати или дека постои една намирница способна преку ноќ да го трансформира нашиот изглед и чувство. Сепак, фактот е дека не постојат инстант-решенија и дека носењето здрави одлуки за исхраната бара доследност. Исто така, важно е здравата исхрана да не се претвори во крут режим кој не дозволува апсолутно никакво отстапување. Дури и Роналдо признал дека повремено – иако многу ретко – си дозволува едноставни шеќери или ултра-преработена храна, делумно за да избегне развивање нездрав однос кон храната.
Малку доследност
Според Ондина, она што треба да се обидеме да го усвоиме не е нужно конкретното мени на Роналдо, туку неговиот пристап кон доследноста. Се проценува дека околу 95 проценти од неговиот ден се одликува со здрави избори, додека преостанатите пет проценти оставаат простор за нешто поинакво. Кај повеќето луѓе, тој сооднос веројатно е обратен, или барем значително поинаков.
Значи, наместо во понеделник да започнеме со строга нова диета – исфрлајќи го шеќерот, лебот или вечерата и ветувајќи си дека ќе се придржуваме до тоа без исклучок – би можеле да примениме многу поедноставен пристап со помали чекори. Би можеле да разгледаме што вообичаено јадеме во текот на денот и да промениме само една работа.
На пример, ако не сте љубител на зеленчук, обидете се да додадете еден вид зеленчук во ручекот. Заменете го засладениот пијалак со вода. Почесто посегнувајте по овошје, риба, мешунки или житарки од цело зрно. И не гледајте на парчето торта или на омилената брза храна како на причина за откажување.
Можеби не сме Роналдо, но можеме да се обидеме да ја усвоиме неговата најважна навика – да бидеме доследни. На крајот на краиштата, добрите навики во исхраната не се создаваат преку ноќ, туку преку мали избори што ги повторуваме ден по ден.
© Vecer.mk, правата за текстот се на редакцијата
