Петметарски мрежаст питон ја усмрти и ја проголта 45-годишната Фарида, мајка на четири деца од индонезиската провинција Јужен Сулавеси. Нејзиното исчезнување било пријавено во четвртокот вечерта од страна на нејзиниот сопруг, откако таа не се вратила дома од селото Калемпанг. Загрижениот маж веднаш организирал потрага заедно со локалните жители во густо пошумено и планинско подрачје.
За време на потрагата, сопругот ги пронашол личните работи на Фарида, што му разбудило сомнеж. Селјаните го пречешлале непосредното опкружување и набрзо забележале огромен питон со невообичаено голем стомак. Жителите донеле одлука да ја исечат змијата, по што во внатрешноста на рептилот било пронајдено целосно облеченото тело на несреќната жена. Иако ваквите настани се ретки, тие сепак се забележани во одредени рурални региони на Индонезија каде што живеат овие опасни рептили.
© Vecer.mk, правата за текстот се на редакцијата
