Сè повеќе инфлуенсери го напуштаат Дубаи во потрага по нови дестинации кои нудат гламур, безбедност и поволни даноци.
Меѓу најбараните локации се издвојуваат егзотичните острови, азиските метрополи и луксузните европски дестинации, а на листата се најде и Црна Гора. Во последните неколку недели сè повеќе инфлуенсери го напуштаат Дубаи, донеодамна речиси подразбирана дестинација за живот во „даночен рај“. Поради нестабилноста на Блискиот Исток, многумина од нив бараат нови локации кои нудат комбинација од гламур, безбедност и поволни даночни услови.
Како една од опциите се издвојуваат Кајманските Острови, познати по животот без даноци и преубавите плажи. Овој карипски архипелаг нуди висок животен стандард, тропска клима и динамичен ноќен живот, со чести забави на бродови.
Слична репутација имаат и Бермудите, кои се истакнуваат со безбедноста, високиот стандард и отсуството на данок на доход и капитална добивка. Посетителите можат да престојуваат до 180 дена без виза, но за работа е неопходна претходно обезбедена дозвола.
Меѓу атрактивните дестинации е и Порторико, кој стана популарен благодарение на даночните олеснувања и пониските трошоци за живот. Бројни инфлуенсери и спортисти веќе се преселија таму за да ги искористат предностите на локалните закони.
Во Азија се издвојува Куала Лумпур, прогласен за еден од најдобрите градови за живот на странци. Градот привлекува со пристапните цени, богатата култура и атракциите како облакодерот „Merdeka 118“, еден од највисоките во светот. Бали, во меѓувреме, стекна репутација на „светска престолнина на инфлуенсерите“. Туризмот таму бележи силен раст, а посетителите го фалат опуштениот начин на живот и природните убавини на островот.
Во Америка, Мајами останува симбол на гламурот, луксузот и активниот социјален живот. Градот привлекува инфлуенсери кои бараат алтернатива за Дубаи, со стабилна економија и богата гастрономска и уметничка сцена.
Како алтернатива на блискоисточните метрополи се споменува и Шангај, кој нуди спој на модерни облакодери, луксуз и развиена инфраструктура. Трошоците за живот можат да бидат пониски отколку во Дубаи, а градот е познат по разновидната понуда на храна и меѓународната заедница.
За оние кои бараат врвен луксуз, тука е Монако – прибежиште на милијардерите, славните личности и инфлуенсерите. Познат е по луксузните хотели, јахтите и отсуството на данок на доход и богатство. Во САД се издвојува и Чарлстон во Јужна Каролина, познат по шармантната архитектура и романтичната атмосфера. Сè повеќе инфлуенсери го избираат овој град поради квалитетот на животот, а не само поради деловните можности.
Во Австралија вниманието го привлекуваат Бајрон Беј и Голд Кост. Поради високите трошоци за живот во Сиднеј и Мелбурн, инфлуенсерите сè почесто се свртуваат кон овие поопуштени и попристапни дестинации.
Во Европа, како дестинација во подем се издвојува Црна Гора, особено Бока Которска и приморјето, познати по спектакуларните пејзажи. Развојот на луксузни марини и комплекси, како „Портонови“, привлекува имотни странци и инфлуенсери.
Понатаму на исток, Макао – познат како „Лас Вегас на Азија“ – нуди раскошни казино-ресорти и развиена туристичка понуда. Меѓу новите опции е и Панама Сити, еден од најкосмополитските градови во Централна Америка. Ги привлекува странците со стабилната економија, користењето на американскиот долар и релативно пристапните луксузни станови.
© Vecer.mk, правата за текстот се на редакцијата
