Фудбалер загина откако го удри гром за време на натпревар во Тајланд, а уште 12 лица се повредени.
Трагедијата се случила за време на аматерски фудбалски натпревар во Тајланд, кога силно невреме го прекинало мечот, а гром удрил директно на теренот.
Во ударот животот го загубил 24-годишниот фудбалер Сафван Авае, кој бил погоден од громот додека се наоѓал на теренот.
По ударот веднаш настанала паника меѓу играчите и гледачите. Неговите соиграчи се обиделе да му помогнат додека лежел неподвижно на тревникот, а набрзо пристигнала и Итната медицинска помош.
Фудбалерот бил пренесен во болница, но лекарите само ја констатирале неговата смрт.
Освен загинатиот фудбалер, во инцидентот биле повредени уште 12 лица, меѓу кои и малезискиот фудбалер Алиф Езахан Зулкифли.
Несреќата се случила за време на турнирот „Голок куп“, регионално аматерско натпреварување на кое учествуваат екипи од Тајланд и Малезија.
Загинатиот Сафван Авае настапувал и за полупрофесионалниот клуб ФК Јала, кој се натпреварува во третата регионална лига на Тајланд.
© Vecer.mk, правата за текстот се на редакцијата
