СОВРШЕНИ СО КАФЕ ИЛИ ЗА УЖИНА: Направете мафини по ваш вкус со овој едноставен трик

Постојат рецепти на кои им се враќаме секојпат кога ќе посакаме нешто слатко, домашно и брзо готово. Токму такви се овие мафини – меки, мирисливи и неверојатно сочни, дури и следниот ден. Не бараат посебни кулинарски вештини, скапи состојки, ниту многу време, а им успеваат речиси на сите.

Идеални се за појадок со кафе, за ужина, за на пат или за моментите кога ви се јаде нешто слатко „на брзина“. Уште една голема предност е што основниот рецепт можете да го менувате по желба – со чоколадо, овошје, ореви или лешници.

Состојки:

• 2 јајца
• 150 г шеќер
• 1 кесичка ванилин шеќер
• 100 мл масло
• 200 мл јогурт
• 220 г брашно
• 1 кесичка прашок за печиво
• прстофат сол

По желба можете да додадете:

• парчиња чоколадо
• боровинки или јагоди
• сечкани ореви или лешници

Подготовка:

1. Во поголем сад изматете ги јајцата, шеќерот и ванилиниот шеќер додека смесата не стане посветла и благо пенеста. Не мора да користите миксер – обична маталка за матење е сосем доволна.
2. Додајте ги маслото и јогуртот, па полека промешајте за да се соединат состојките.
3. Во посебен сад измешајте ги брашното, прашокот за печиво и прстофатот сол, па сувите состојки постепено додавајте ги во течната смеса.
4. Мешајте кратко, колку само да нема грутчиња. Токму тоа е еден од најважните трикови за меки мафини – ако смесата ја мешате премногу, ќе станат тврди по печењето.
5. На крајот додајте го чоколадото, овошјето или јаткастите плодови по желба.
6. Загрејте ја рерната на 180°C.
7. Калапот за мафини обложете го со хартиени кошнички или благо подмачкајте го со масло. Истурете ја смесата така што кошничките ќе бидат исполнети до две третини.
8. Печете околу 20 до 25 минути, додека мафините не добијат златна боја и додека чачкалката вметната во средината не излезе сува.

Мал трик поради кој остануваат сочни

Најголемата грешка кај мафините е предолго печење. Штом поцрвенат, извадете ги од рерна. Така ќе останат меки, воздушести и следниот ден.

Можете да ги поросите со шеќер во прав, да ги послужите со овошје или едноставно да ги јадете додека се уште топли – тогаш се најубави.