Француската влада би можела да воведе даночни мерки за намалување на профитот на прехранбените компании доколку тие не прифатат разговори за високите цени.
Ова го изјави министерот за финансии Бруно Ле Мер, пренесува Капитал.
Со инфлацијата на храната од 15 проценти во последните месеци, владата е бесна што цените на мало не паѓаат и покрај падот на цените на суровините.
Ле Мер рече дека прехранбената индустрија жнее огромен профит и дека мора да се отворат годишни разговори со трговците на мало и да се намалат цените.
„Доколку прехранбената индустрија не се врати на преговорите, ќе ги искористиме сите мерки што ни стојат на располагање, вклучително и даноците, со цел да го вратиме неправедно остварениот профит на грбот на потрошувачите“, изјави министерот за финансии на новинарите пред разговорите со големите трговци.
Цените на храната во Франција скокнаа откако прехранбените компании и трговските синџири се договорија за просечно зголемување на цената од 10 отсто во март за покривање на зголемените трошоци.
Но, со оглед на тоа што цените на храната се над вкупната инфлација, Ле Мер постојано повикуваше на повторни преговори за да може глобалниот пад на цените на суровините да се пренесе на потрошувачите.
