Дојави за бомби во училишта во Белград утрово предизвикаа евакуација на ученици и вработени во повеќе образовни објекти, откако на електронските адреси на училиштата пристигнале пораки за наводно поставени експлозивни направи.
Според првичните информации, заканите биле испратени по електронска пошта и опфатиле училишта во повеќе белградски општини и приградски населби. Безбедносните протоколи веднаш биле активирани, а наставата во засегнатите објекти е привремено прекината.
Дојави, меѓу другите, пристигнале во основно музичко училиште во Звездара, училиштето „Драган Ковачевиќ“ во Стариот град, како и во училишта во Калуѓерица, Сурчин, Вождовац, Лазаревац, Обреновац и Батајница.
Полицијата е на терен и врши контрадиверзиони проверки во објектите каде што се пријавени заканите. Учениците и вработените ќе можат да се вратат во училиштата откако надлежните служби ќе утврдат дека просториите се безбедни.
Ваквите дојави во Србија и регионот во изминатите години се повторуваа во повеќе бранови, најчесто преку електронска пошта, при што училиштата беа евакуирани, наставата прекината, а полицијата излегуваше на терен за проверки. Во голем дел од претходните случаи, по контрадиверзионите прегледи било утврдено дека дојавите биле лажни, но секоја нова закана се третира според безбедносна процедура.
© Vecer.mk, правата за текстот се на редакцијата
