Претседателот на Република Српска, Милорад Додик, по средбата во Москва со секретарот на Советот за безбедност на Русија, Сергеј Шојгу, изјави дека Босна и Херцеговина е „неуспешна земја и колонија со која управуваат странци“. Тој истакна дека Бања Лука води секојдневна битка за да се ослободи од колонијалниот јарем наметнат од лажните високи претставници и странските судии во Уставниот суд.
Додик упати и сериозни безбедносни обвинувања, тврдејќи дека Западот промовира опасни воени коалиции во регионот.
Обвинувања за антисрпски сојуз и радикален исламизам
Според Додик, официјална Москва ја споделува загриженоста за обидите на некои западни земји, предводени од Германија, да формираат воени групи на Балканот.
„Сметаме дека Хрватска, Албанија и таканареченото Косово формираат антисрпски воен сојуз. Загрижувачки е што Европа како политичка заедница сè повеќе се претвора во воена структура“, изјави Додик.
Тој повлече и историска паралела со војната во БиХ, тврдејќи дека остатоците од озлогласената единица „Ел Муџахедин“, која вршела злосторства врз Србите, сè уште се активни како терористичка структура.
Економска поддршка и отворена соработка со Кремљ
И покрај жестоките притисоци и ограничувања од Западот, Додик потврди дека Република Српска и Русија ги делат идентичните ставови за регионалните и глобалните случувања. На средбата со Шојгу било договорено продолжување на економската и културната соработка, како и зачувување на руските инвестиции во Република Српска.
Лидерот на Српската повтори дека неговиот ентитет никогаш нема да се согласи на санкции против Москва и испрати директна порака за војната во Украина:
„Ние јасно ја поддржуваме специјалната воена операција и сакаме Русија да ги постигне своите цели за завршување на војната во согласност со руските интереси.“
© Vecer.mk, правата за текстот се на редакцијата
