По повеќемесечна опсежна и детална истрага, обвинителството во Сараево конечно подигна обвинение за трагичната несреќа со „трамвајот на смртта“ од февруари годинава, во која го изгуби животот еден млад студент, а тинејџерка се здоби со тешки телесни повреди.
Обвинението е покренато против Аднан Касаповиќ, кој на 12 февруари управувал со трамвајот што се преврти кај зградата на американската амбасада. Според истрагата, при влегување во раскрсницата со недозволено голема брзина, возилото излетало од шините и директно го прегазило 23-годишниот Ердоан Моранкиќ, студент на Академијата за ликовни уметности, кој починал на лице место.
Во неконтролираниот налетот на трамвајот, тешко беше повредена и 16-годишната Еле Јовановиќ, ученичка во Католичкиот училиштен центар. Лекарите со надчовечки напори успеаја да ѝ го спасат животот, но мораа да ѝ ја ампутираат ногата. По неколкумесечно мачно лекување и рехабилитација, Еле денес повторно оди благодарение на протеза.
Оваа ужасна трагедија го крена цела Босна на нозе. Револтот предизвика масовни неколкунеделни протести на средношколците и студентите низ улиците на Сараево, што на крајот резултираше со паѓање и оставка на целата кантонална влада.
Обвинителството потврди дека обвинението, поддржано со бројни вештачења и докази, е испратено на потврда до Кантоналниот суд. Веднаш по несреќата, градското сообраќајно претпријатие ГРАС целосно ги повлече од употреба сите стари чешки трамваи „Чешка Дроп“, од кои некои беа стари и над 40 години, заменувајќи ги со нови модерни возила од швајцарскиот производител „Штадлер“.
© Vecer.mk, правата за текстот се на редакцијата
