Состојбата со поплавите во Албанија е сè уште критична, поради обилните врнежи од дожд што траат од вчера.
Најпогодена од поплавите е Ѓирокастро. 70 бизниси, бројни куќи и возила беа уништени во населбата „18 Септември“. Речиси апокалиптични сцени со големи количини на остатоци и камења на улиците и во продавниците се резултат на масовното излевање на реките и потоците.
Најмалку 800 поплавени станбени згради и 304 евакуирани лица е прелиминарниот биланс на поплавите во Драч, објавува Топ ченел.
Еден ден по обилните дождови, ситуацијата во Драч изгледа помирна, но останува проблематична во одредени делови од градот, главно на периферијата.
Дури и во затворот во Драч, ситуацијата останува проблематична. Има високо ниво на вода во дворот и на првиот кат од зградата. Дури и денес, наставата не се одвива во некои училишта чии дворови се под вода.
Во текот на ноќта имаше помалку врнежи во Леже, но денес ситуацијата се покажува како попроблематична во Лач. Неколку семејства се евакуирани, а многу куќи се опкружени со вода.
Нивото на реката Вјосе достигна 7,2 метри надморска височина и се приближува кон критичната точка. Пријавено е дека се излеала од корито во пазарната област, во близина на мостот Мифоли.
Ситуацијата е многу тешка во одредени оддалечени области на општина Кукеш, каде што голем број села се уште се блокирани поради лоши временски услови и масовни лизгања на земјиштето. Најсериозна ситуација е пријавена во административната единица Запот, каде што сите три патишта што ја поврзуваат оваа зона со градот Кукеш се целосно блокирани.
Автопатот Бурел-Решен е многу тешко прооден за секаков вид возила поради бројни проблеми. Покрај долгорочното дотраеност на овој пат, најновите врнежи од дожд предизвикаа одрони на камења и лизгање на земјиштето на неколку делници.
© Vecer.mk, правата за текстот се на редакцијата
