Џастин Бибер се врати на големата сцена по долга пауза со настап на фестивалот Коачела, но неговото враќање предизвика мешани реакции кај публиката.
Многу обожаватели чекаа со часови на неговиот настап доцна во ноќта, кој беше одложен поради лоши временски услови и силни ветрови. Иако беше еден од најочекуваните изведувачи на вечерта, дел од публиката беше разочаран од она што го виде на сцената.
Бибер настапи во многу поедноставна и минималистичка продукција, т.е. без танчери, со пригушени светла и поакустични аранжмани. Тој го изведе поголемиот дел од концертот седејќи на пијаното, со мал придружен бенд, фокусирајќи се повеќе на вокалите отколку на спектаклот.
Додека некои го пофалија поинтимниот пристап и акцентот на музиката, други сметаа дека настапот не ги оправда високите очекувања, особено затоа што тоа беше негово прво појавување на голем фестивал по повеќегодишна пауза. И покрај критиките, неговото враќање на сцената привлече огромно внимание и од медиумите и од публиката.
© Vecer.mk, правата за текстот се на редакцијата
