Аријана Гранде во солзи се прости од обожавателите на последниот концерт од турнејата „Eternal Sunshine“, одржан во вторникот вечерта во Лондон. По завршувањето на турнејата, 33-годишната пејачка планира да земе пауза и да се повлече од јавноста.
Гранде турнејата од вкупно 41 концерт ја заврши во лондонската „О2 Арена“, каде што одржа дури десет настапи, по концертите ширум САД и во Монтреал, пишува „Пејџ сикс“ (Page Six).
Емотивно простување од публиката
„Ова беше едно од најубавите и најпосебните искуства во мојот живот и само сакам да ви се заблагодарам, а притоа целосно да не се расплачам“, рече Гранде низ солзи, се гледа на видеото што „Поп бејс“ (Pop Base) го објави на платформата Икс (X).
„Навистина ви благодарам од срце. Беше толку посебно и ова искуство ќе го патам засекогаш. Ги имам најдобрите обожаватели во светот и тоа е така отсекогаш“, продолжи таа.
Гранде го пофали и трудот што нејзините обожаватели го вложиле во своите комбинации и пораките што ги носеле на концертите. „Ги обожавам вашите комбинации, вашите лица, сакам да ве гледам и да се поврзувам со вас на овој начин“, порача таа. „Ви благодарам за сè што направивте ова да биде толку посебно. Сите ваши пораки, костими, облека и шминка се прекрасни.“
„Ја сакав секоја минута помината со вас и сакам да знаете колку сум благодарна. Ви благодарам и многу ве сакам“, додаде таа.
По турнејата се повлекува од јавноста
Нејзиниот портпарол во август потврди дека поп-ѕвездата по завршувањето на турнејата ќе се повлече од јавноста. Тој објасни дека Гранде се радува на завршувањето на турнејата и дека сака да ја приведе кон крај здрава и среќна, по што планира да земе заслужена пауза од јавните настапи и појавувања. Последниве години, додаде тој, поради нив била изложена на непрестајно јавно преиспитување.
Соопштението пристигна откако Гранде се соочи со жестоки коментари и критики поради губењето килограми, особено откако на 31 јули беше објавен спотот за песната „Petal“.
Пејачката подоцна им нагласи на обожавателите дека одлуката за повлекување не ја донела ненадејно. „Вчерашната објава не беше реакција ниту импулсивна одлука. Тоа е нешто што одлучив да го испланирам“, рече таа за време на концертот во Чикаго и додаде дека одлуката ја донела „во тишина, уште одамна“.
Таа се откажа и од настапот во обновената продукција на мјузиклот на Стивен Сондхајм „Sunday in the Park with George“ на лондонскиот Вест Енд, која требаше премиерно да биде изведена следното лето.
Ја обнови врската со поранешното момче
Гранде последниве недели е во медиумите и поради приватниот живот. Ја обнови врската со Рики Алварез (34), со кого беше од 2015 до 2016 година. „Пејџ сикс“ во јули објави дека повторно се заедно по нејзиното раскинување со Итан Слејтер (34), со кого беше во врска три години.
Се чини дека Гранде минатиот месец и самата навести дека се помирила со Алварез. Таа објави фотографии од Лондон на кои се гледа нова тетоважа на клучната коска, а се чини дека на неа пишува „I do love you“.
© Vecer.mk, правата за текстот се на редакцијата
