Актерката Бани Левин, поранешна библиотекарка која подоцна во животот започнала да се занимава со глума и остварила повеќе од 100 улоги на филм и телевизија, вклучувајќи ги и појавувањата во сериите „Гилморови“ (Gilmore Girls) и „Закон и ред“ (Law & Order), почина на 97-годишна возраст.
Нејзината смрт на 23 август за USA Today ја потврди нејзиниот долгогодишен застапник Мајкл Ајзенштат. Тој изјави дека актерката починала во сон.
Ајзенштат додаде дека Левин била „сè уште активна на аудициите и работела“, опишувајќи ја како „прекрасна и неустрашлива актерка и многу мила дама“ која ќе им недостасува на сите.
Филмската и телевизиската кариера на Бани Левин траеше од 1988 до 2026 година, а оствари помали улоги во бројни популарни телевизиски серии, меѓу кои се „Закон и ред“, „Сите го сакаат Рејмонд“ (Everybody Loves Raymond), „Грда Бети“ (Ugly Betty) и „Две девојки без денар“ (2 Broke Girls).
Во серијата „Гилморови“ се појави како г-ѓа Томпсон, постара жена со која Лук (го глуми Скот Патерсон) се расправа поради преместувањето на чамецот што бил складиран во нејзината гаража. Станува збор за епизода од петтата сезона. Нејзините понови телевизиски улоги ги вклучуваа и сериите Jury Duty и Mrs. Davis.
На филмското платно, Левин глумеше благајничка во театар во оскаровскиот филм „Ла Ла Ленд“ (La La Land), а се појави и во остварувањата „Телма“ (Thelma) и „Сакраменто“ (Sacramento).
Повеќепати соработуваше и со Адам Сендлер, појавувајќи се во неговите филмови „Не се закачај со Зохан“ (You Don't Mess with the Zohan), Sandy Wexler и You Are So Not Invited to My Bat Mitzvah.
Со глума започнала да се занимава дури по пензионирањето
Во интервјуто што Левин во 2025 година го даде за студентскиот весник The Daily Evergreen, некогашниот весник на Државниот универзитет во Вашингтон, таа зборуваше за тоа како отсекогаш ја сакала глумата.
Уште од младоста имала страст кон глумата, но ја ставила во втор план откако добила деца.
Се преселила во Њу Џерси, каде што работела како училишна библиотекарка. Сепак, по пензионирањето одлучила професионално да почне да се занимава со глума.
© Vecer.mk, правата за текстот се на редакцијата
