Македонскиот Културно-информативен центар во Софија и Друштвото на писателите на Македонија потпишаа Меморандум за соработка, со што, информираат од Центарот.
„Воспоставена е цврста основа за понатамошно унапредување на соработката во областа на културата, книжевноста и промоцијата на македонското духовно и литературно творештво“.
Меморандумот го потпишаа директорот на КИЦ на Република Македонија во Софија, Зоран Пејковски, и претседателката на ДПМ, Гордана Јовиќ-Стојковска.
Со потпишувањето на овој документ двете институции ја потврдија својата заедничка определба за воспоставување долгорочно партнерство, засновано врз заемна поддршка, размена на искуства и реализација на заеднички проекти од национално и меѓународно значење. Меморандумот предвидува развивање на соработка во организирањето книжевни промоции, авторски средби, трибини, научни конференции, изложби, литературни фестивали, преведувачки проекти, издавачки иницијативи и други културни содржини кои ќе придонесат за афирмација на современата македонска литература и нејзино претставување пред меѓународната јавност. Истовремено, документот отвора можности за продлабочување на соработката меѓу писателите, книжевните истражувачи, преведувачите и културните работници, како и за заедничко аплицирање на проекти од национален и меѓународен интерес, додаваат од КИЦ, Софија каде што е потпишан меморандумот.
Од Македонскиот културно-информативен центар во Софија посочуваат дека и во иднина ќе се создава простор за претставување на најзначајните достигнувања на македонската книжевност како и воспоставување нови партнерства со релевантни културни институции.
„Во таа насока, соработката со Друштвото на писателите на Македонија претставува значаен исчекор кон уште посистематска промоција на македонските автори и нивното творештво“, стои во објавата.
Претседателката на ДПМ пак Јовиќ-Стојковска, на центарот му предала донација од изданијата на Друштвото на писателите на Македонија, наменета за библиотеката на организацијата, кои ќе бидат достапни за посетителите, студентите, истражувачите и сите љубители на македонската книжевност.
© Vecer.mk, правата за текстот се на редакцијата
