Крива Паланка синоќа беше во знакот на музиката, добрата забава и илјадниците посетители кои се собраа на Градскиот стадион за голем концертен спектакл. На сцената настапија регионалната музичка ѕвезда Лепа Брена, Аца Пејовиќ и Слаткар, приредувајќи вечер исполнета со познати хитови, емоции и атмосфера која долго ќе се памети.
Концертот на Лепа Брена првично требаше да се одржи во саботата, но поради силното невреме и неповолните временски услови настапот беше одложен за 30 август. Следниот ден, Брена заедно со Аца Пејовиќ и Слаткар повторно ја наполни сцената, а публиката со голем ентузијазам го дочека спектаклот.
Одложувањето поради невремето не ја намали заинтересираноста на публиката. Напротив, Градскиот стадион беше преполн, а во Крива Паланка пристигнаа посетители од различни делови на земјава и регионот. Градоначалникот Сашко Митовски по концертот порача дека најважно било настанот да се одржи во безбедни услови.
„По сè што поминавме во изминатите два дена, оваа слика вреди повеќе од илјада зборови. Најважно беше сите услови да бидат безбедни, а потоа Крива Паланка да го добие настанот што го заслужува. Благодарам на публиката за трпението, довербата и прекрасната енергија. Крива Паланка покажа дека знае да биде вистински домаќин“, изјави Митовски.
Лепа Брена непосредно пред првично планираниот настап преку социјалните мрежи ја информираше публиката дека концертот мора да биде одложен поради временските услови.
„Поради изненадни и неповолни временски услови, вечерашниот концерт во Крива Паланка за жал е одложен“, порача пејачката, додавајќи дека настапот ќе се одржи еден ден подоцна, на 30 август.
И покрај одложувањето, публиката не се откажа од концертот, а спектакуларната вечер покажа дека интересот за регионалните музички ѕвезди и понатаму е огромен. Брена, која со децении е присутна на музичката сцена, повторно покажа дека и денес може да создаде атмосфера која ја носи публиката во еуфорија.
© Vecer.mk, правата за текстот се на редакцијата
