Американскиот претседател Доналд Трамп денеска изјави дека ќе го номинира основачот на конзервативната медиумска надзорна организација Ел Брент Бозел Трети за директор на Американската агенција за глобални медиуми (УСАГМ), што е одговорна за надзорот на американските јавни медиуми во странство, вклучително Гласот на Америка и Слободна Европа.
- Малкумина се запознаени со глобалниот медиумски пејзаж на печатените медиуми, телевизијата и интернетот од Брент, кој е основач и претседател на Центарот за медиумски студии (ЦМС) веќе 38 години, напиша Трамп на социјална мрежа „Трут“ (Truth).
ЦМС е американска медиумска надзорна организација, блиска до конзервативните кругови.
- Ел Брент Бозел Трети и неговото семејство со генерации се бореле за американските принципи за слобода, еднаквост и правда и тој ќе се погрижи пораката да биде слушната од слободољубивите луѓе ширум светот, наведе Трамп.
© Vecer.mk, правата за текстот се на редакцијата
