Лидерите на Франција, Велика Британија и Германија денес разговараа со американскиот претседател Доналд Трамп за ситуацијата во Украина со цел „да се поместат работите од мртва точка“, потврдија францускиот претседател Емануел Макрон и Елисејската палата.
Според Макрон, повикот траел 40 минути, а Елисејската палата објави дека британскиот премиер Кир Стармер и германскиот канцелар Фридрих Мерц учествувале во телефонскиот разговор.
Нови разговори со сојузниците
Франција, исто така, објави дека утре ќе се одржи видео повик на лидерите на сојузниците на Украина. Повикот доаѓа во време кога Трамп врши притисок врз Киев да прифати договор за прекин на руската инвазија.
Денешниот разговор се одржа откако украинскиот претседател Володимир Зеленски во вторникот изјави дека е подготвен да одржи нови избори во Украина, но под услов безбедноста да биде загарантирана. Во понеделник, европските сојузници на Украина изразија поддршка за Зеленски, додека изразија скептицизам во врска со некои делови од најновиот предлог на САД за прекин на војната.
© Vecer.mk, правата за текстот се на редакцијата
