Руски ракетен напад врз селото Печенехи во Харковската Област утрово однесе 10 животи, а 18 лица се повредени, соопшти гувернерот на Харковската регионална воена администрација, Олег Синехубов. Повредените се пренесени на лекување, додека спасувачките екипи работат на расчистување на последиците, откако во нападот биле погодени пошта и продавници. Синехубов дополнително го потврди зголемувањето на бројот на повредени од осум на 18, а за нападот се огласи и украинскиот претседател Володимир Зеленски, кој најави жесток одговор, објави „Киев пост“.
„Русите утрово брутално погодија прометна раскрсница во Печенехи, во Харковската Област, каде што се наоѓаат пошта и продавници, опкружени со станбени објекти“, напиша Зеленски на социјалните мрежи, изразувајќи сочувство до семејствата и блиските на загинатите.
Според него, спасувачите веќе го изгаснале пожарот, но итните и другите служби продолжиле да работат на местото. Во тек е истрага за околностите на нападот.
„Дефинитивно ќе одговориме на овој руски напад. Подеднакво важно е и партнерите да ги надополнат нашите оправдани одговори со свои чекори за зголемување на притисокот врз Русија и поддршка за Украина“, додаде Зеленски.
Синехубов прецизираше дека во нападот биле запалени кафуле и седум автомобили, на површина од околу 400 квадратни метри. Оштетени биле и 10 приватни куќи, објектот на поштата, пет продавници и 15 автомобили.
„Медицинските екипи им ја пружаат потребната помош на повредените. Се расчистуваат урнатините од оштетените објекти, а службите за итни случаи го пребаруваат околното подрачје во случај на потреба од помош за други луѓе“, се додава во соопштението.
Руски дронови рано утринава го нападнаа и Киевскиот регион, при што биле оштетена деловен објект, магацини и приватна куќа во областа Бровари. Засега не се пријавени жртви.
© Vecer.mk, правата за текстот се на редакцијата
