Силната ерупција на вулканот Фуего во Гватемала предизвика евакуација на најмалку 1.700 луѓе од населените места во близина на кратерот, додека властите прогласија највисок степен на опасност во регионите засегнати од пепелта.
Фуего (што на шпански значи „оган“) се смета за најактивниот вулкан во Средна Америка. Се наоѓа во близина на главниот град на Гватемала, а во нова еруптивна фаза влезе во понеделникот наутро. Неговата активност дополнително се интензивираше во текот на ноќта, кога реки од лава почнаа да се спуштаат низ падините, а во небото се издигнаа огромни столбови од гас и пепел.
„Вулканот минува низ една од своите најкритични експлозивни фази, исфрлајќи реки од кал, вжештени карпи, гас и пепел“, изјави Едвин Рохас, директор на вулканолошкиот институт „Инсивумех“ (Insivumeh).
Црвен аларм за регион од 1,6 милиони жители
Националната агенција за координација при катастрофи (CONRED) ја подигна тревогата на црвено ниво за регионите Сакатепекез, Чималтенанго и Ескуинтла, каде што живеат околу 1,6 милиони луѓе.
Според извршната секретарка на CONRED, Клаудин Огалдес, околу 29.000 луѓе се директно изложени на пепелта, поради што ги повика жителите од околните села да носат заштитни маски и да ги покријат залихите со храна и вода.
Според експертите од „Инсивумех“, над кратерот се формирала фонтана од лава висока од 200 до 300 метри, додека густиот столб од пепел достигнал висина од над 7.000 метри. На височина меѓу 5.000 и 6.000 метри, пепелта се шири и до 130 километри кон запад.
Поради опасните услови, Министерството за образование ја прекина наставата со физичко присуство во училиштата во трите нај засегнати градови.
Сеќавања на трагичните ерупции
Гватемала се наоѓа на Пацифичкиот огнен појас и редовно се соочува со силна сеизмичка и вулканска активност. Најсмртоносната историска ерупција во регионот се случила во 1902 година, кога загинале околу 30.000 луѓе за само неколку минути.
Исто така, во 2018 година, во силните текови од лава кои опустошија цело село на падините на овој вулкан висок 3.763 метри, загинаа 215 луѓе, а околу 200 се водеа како исчезнати.
© Vecer.mk, правата за текстот се на редакцијата
