Генералниот секретар на НАТО, Марк Руте, изјави дека алијансата има планови да одговори на саботажи и инциденти со беспилотни летала, откако данската разузнавачка служба предупреди за растечката руска хибридна кампања, пренесе Асошиејтед прес.
Руте рече дека НАТО може да одговори на ваквите закани и дека граѓаните на 32-те членки можат да останат смирени.
Зборувајќи во Њујорк на одбележувањето на годишнината од нападите на 11 септември 2001 година во САД, тој рече дека зголемувањето на хибридните инциденти во земјите-членки ја покажува послабата позиција на Москва во војната против Украина, која влезе во својата петта година.
„Сите опции за одговор се на маса и ќе користиме што ни треба. Путин е во лоша позиција. Тој не ја добива војната во Украина“, рече Руте.
Данската воена разузнавачка служба во нова проценка на ризикот наведе дека Русија веројатно ќе ги зголеми хибридните активности кон Западот и НАТО, објави Би-би-си.
Ова вклучува саботажи, кибер напади, дезинформации и други неконвенционални форми на притисок, а службата предупредува дека ова може да вклучува и катастрофални кибер напади врз клучни општествени функции и саботажи со висок ризик од жртви.
Според проценката на данските служби, постои мал, но растечки ризик од ограничен воен напад врз една или повеќе членки на НАТО што граничат со Русија, потенцијално во наредните месеци. Во исто време, се наведува дека нема индикации дека Москва би започнала отворена инвазија врз членовите на Алијансата.
Асошиејтед Прес објави дека бројот на регистрирани хибридни инциденти се зголемил од 59 во март 2025 година на повеќе од 200 досега. Полскиот премиер Доналд Туск минатата недела предупреди дека Русија би можела да изврши напади со беспилотни летала или ракети врз европските земји што ја поддржуваат Украина, вклучително и Полска, а потоа да се обиде да ги претстави како случајни инциденти.
Функционерите на НАТО и Европската Унија, како и амбасадорот на САД во НАТО, Метју Витакер, велат дека засега нема знаци за непосреден поширок конфликт или необични воени активности по должината на европските граници кон Русија.
© Vecer.mk, правата за текстот се на редакцијата
